「你搭錯車呀！」

唔知大家有冇留意到爽浪新出個廣告？我自己好鍾意。最先吸引我的，是配樂，有點類似「假如愛有天意」的感人樂章(配樂好緊要﹗而家個個對住電腦)。再看畫面，那是一幕搭火車戲，車站上人頭湧湧，焦點落在一個正在上火車但又有點猶豫的男人上。未幾，有個斜面版的章子怡追過來，對火車入面的男人口o翕o翕唔知講乜，最後仲仆埋o係地。呢個時候，有個小販走過來叫女人食爽浪，女人食完大叫：「你搭錯車呀﹗」男人驚訝，火車急剎制，鏡頭竟有震動來配合，第一次睇真係笑o左出來，夠低能我鍾意。全片拍得極有民初年代感覺，配合音樂，很有感染力。爽浪那些紅紅綠綠的包裝袋，在穿著啡黑色舊衫的人們的對比下，非常突出，好！最緊要係比段片扼到，以為係乜事，點知係香口膠廣告。

在某討論區入面，好些人都讚呢個廣告好睇好有創意。好睇？呢層當然。但好有創意嘛，又未至於。我覺得個廣告意念幾正路，都係從爽浪的基本用途出發，構思了這場火車戲，說穿了就係用一段片段吸引了觀眾注意後，再交代產品訊息。哪個廣告唔係片段來？係，之不過一般廣告都係Hard sell到極，一開始就知道買乜，好似相機廣告永遠都係搵明星周圍影；麥記的飯Tastic就係咁飯Tastic煩到嘔。而爽浪那類廣告的分別在於：一開始唔會交代產品訊息，要睇到落去先知。片段可以無厘頭可以有意思，總之就天馬行空有違「常理」。這樣的招式，以前Sunday用得多，用得仲勁。

縱使這類廣告夠Eye catching，但客戶通常都會嫌呢類廣告百搭冇性格，還是Hard sell穩陣，所以大多否決這類廣告出街。於是，客戶說話入面10個有8個廣告都係沉悶乏味又單調。而爽浪呢個，只是在一眾悶極的廣告下先脫穎而出，感覺上先有新意，正如當全世界都是醜八怪的時候，五官端正都可以變做天使。再配合音樂、畫面、幽默，令到人留下深刻印象，有機會我都想睇多幾次。

有人話過，唔理o個件事/廣告係好係壞，總之有Noise最緊要。姑勿論對與否，這個廣告都係成功，至少有反應(我也在此胡扯一番)。也至少，唔會見到Extra曬駱駝那種演譯方式(佢仲夠膽死出隻駱駝公仔，頭上面有個太陽的，雖然幾趣怪)。

PS.亞視又有十大廣告投票，今年係第12屆了，大家不妨上網望望。
http://www.hkatv.com/special_events/06/tvc_award_2006/