無印極品

上個星期不知做乜總係提唔起勁，乜都冇Post，乜都冇做。別人話我是來M，如果是來M也好，起碼也知道點解。反而為了這包白朱古力士多啤梨，我連跑帶走咁連續兩日踏足朗豪坊7樓。

早幾日，一位同事剛剛從日本出差返來，帶了盒白朱古力士多啤梨作手信。我很貪心，食o左好多粒，因為真係好好味！好好味！好好味！點講好呢？本來我不是太鍾意白朱古力，因為她不像黑朱古力般，有可可的甘香，很奶，真是一粒起兩粒止，連嗜食朱古力和甜品的我都吃不消。但有了清新而酸酸地的士多啤梨在，那股濃烈的奶味就冇訂企，令到白朱古力易入口得多。這是士多啤梨才有這樣的效果，還要原粒才行，因為脫了水的她口感鬆化(我想不到更佳的形容詞)，配合表面上類似種籽的東西，有得o趙o下，非一般士多啤梨醬所能媲美。反倒是黑朱古力配上士多啤梨也不行，因為可可味會蓋過士多啤梨味的。

至於食時亦有不同的感覺，就像食麥提莎般有不同食法(低俗是廣告的問題)。你可以放入口中，慢慢感受同忍耐白朱古力那種奶同甜，待士多啤梨出場後刺激味蕾，把奶味一掃而空，頗有「終於等到」的感覺。或者放入口之後即刻咬爛佢，酸甜立刻混和，就好像「品嚐」著士多啤梨味奶般，幸福滿瀉。所以嘛，白朱古力同士多啤梨的真是Perfect match來。

那天我放工之後，說得好聽點就係想重溫呢種感覺，其實就係自己為食唔夠喉，於是動身去買。香港那裡有這些人間極品賣呢？無印良品。記得上年已經在那裡買過來食，但之後想買又冇，至明白原來他們的食品真的是季節限定的，不像坊間好多寫著季節限定的食品一年四季都見到佢個樣，最明顯的例子是Melty kiss。唔知而家有冇貨呢？二話不說就搭車去旺角朗豪坊睇睇了。其實我是在紅隧轉火車的，當然旺角都方便，麻煩在是朗豪坊真是太豪太大座，行街係好，但帶著好想食好想食好想食的心情上去7樓，搞到好似登山咁，慘過真係登山。企o係度等升降機又難以平伏我按捺不住的食欲喎！

好了，幾經辛苦終於來到，那時9點幾，應該未收工o卦。但點知佢問口落o左閘o喎？唔知搞佢乜鬼提早收工，嘩，心情真係直跌谷底，晴天霹靂，十萬個失望，就好似封面寫著冇格的AV原來係有格一樣，得個睇字，還要是無奈地看。好，冷靜幾分鐘，平息了失望的情緒之後，立刻從谷底爬番上來，轉戰地點去零食物語搏一舖。「邊度有零食物語？」「邊度有零食物語？」「邊度有零食物語？」.....心入面不停問自己呢個問題。一輪搜畫之後卒之俾記起女人中心有，於是直去啦。點知又係冇，度了間舖幾次之後，買了一排同是M字頭的MEIJI士多啤梨朱古力食算。唉，真係比不上，不是那隻感覺。

第二日再接再厲啦，卒之俾我買到啦！但成$22包啊！就是大家見到的。包包的粒數不同，因為每粒士多啤梨的大小都不同。我一次過買了兩包。第一粒帶著失而復得的感覺，所以份外美滿。一粒接一粒，在步向火車站時已經KO了兩包，感覺如何？

想嘔。

冇錯，雖然好好食，但兩包已經係極限，始終白朱古力都係好奶。儘管如此，她始終是極品零食來的，冇損我對她的愛戴，諗起又想食，果真食色性也。大家都點買包試試啦！季節限定！季節限定！季節限定啊！

至於黑朱古力其實都有佢o既最佳配搭的，就是蕉，有機會再說。